撇Girly形象　王若琪重新出發做自己

歌手王若琪（Takki）到電台宣傳新歌《世人笑我太瘋癲》，她指歌曲是一首情歌：「以往嘅作品好多都自己寫，今次搵咗好朋友Kenix，佢寫好多唔同嘅歌，例如容祖兒首《最後的茱麗葉》，嗰時未入行已經好鍾意。之後識咗Kenix，覺得佢寫得咁好聽，不如寫一首畀我。」Takki表示與Kenix認識10年也沒有機會合作，這首歌是幾年前二人在對方的家一起寫：「改咗幾個version，幾年前錄過一個，但覺得唱得比較Girly啲，因為之前形象比較Girly，今年特登用個硬朗少少嘅唱腔重新錄過。多謝公司，因為係要重新畀錢。」她自言去年因媽媽入院而停工一段時間，今年重新出發做自己的Project。

「又要威又要戴頭盔」

提到新歌由林若寧填詞，Takki說：「好多謝佢畀個咁正嘅名我，係講不被世俗認同嘅愛情，我覺得雖然呢班係小眾，但其實佢哋都好開心。」她指自己10年前第一首歌《左手》都是類似意念，但這幾年經歷了很多、長大了：「以前好似好型，要堅持做自己，但個心係驚嘅，即係又要威又要戴頭盔，好介意人哋點睇。」Takki坦言以往比較少發表意見，擔心被人覺得麻煩或不聽話：「今年開始好多嘢都自己做番，搵咗好多朋友幫手，形象又變番中性啲。」她稱很多人都覺得中性歌手很難做：「因為客戶，香港artist主要收入唔係騷，冇乜騷㗎嘛，真係為咗廣告。以往Girly啲嘅時候接到啲，但唔係做得好開心。」

染了一頭白髮的她笑言不能維持這髮型太久，因為開始甩頭髮，加上每天做Treatment亦很麻煩。她希望日後多點寫歌，至於早前與李端嫻組成日月系，但因各有各忙，今年會各自做自己的工作。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon