冇諗過退休　譚炳文憶離世後輩感慨嘆

被喻為「本地配音大師」譚炳文早前因氣喘入院，現已沒什麼大礙，相對於2002年於新加坡做騷發現心臟有問題，要立即回送入深切治療部進行心臟搭橋手術，這回是小兒科，譚炳文在電台節目中，中氣十足說：「嗰次係逃過鬼門關，發現心臟兩條血管完全閉塞，通波仔都唔得，要搭橋；今次醫生話或者係感冒菌造成氣喘，佢幫我抽咗血驗，帶住氧氣罩吸氣吸咗十分鐘就瞓着咗，點知個女趁我瞓着影咗我帶住氧氣罩嘅相放上網，只係睇嚟好嚴重，其實有咩嘢，本來仲想返工，但醫生話我要休息。」

最後悔指反吸煙宣傳片

譚炳文是香港「配音界翹楚」，不少電台、電影、廣告播音員，包括為動畫人物叮噹配足三十二年的林保全都隨他學習成名，七、八十年代，不少廣告或政府宣傳短片，均由譚炳文聲言，但原來譚炳文一度後悔接下當中一次政府的工作，譚炳文說：「當年配咗好多政府宣傳片同香煙廣告，最後悔係接咗尤伯連納嘅反吸煙宣傳片，所有香煙廣告即停，廣告商話我叫人唔好食煙，所以要換人！好彩後來都禁晒香煙廣告，要唔係就喊得一句句。」

自認肯花錢

七十年代，譚炳文憑《歡樂今宵》趣劇《大鄉里》炳門一角走上事業高峰，甚至自組公司開拍《大鄉里》電影，廣告配音工作至今仍不停，被問及「歌影視播配」瓣瓣掂是否賺落很多錢，譚炳文說：「賺得唔算多，但能養妻活兒，加上我其實都算大使，我鍾意食最好嘅嘢，飲最靚嘅酒，所以我唔算有錢，但肯花錢，我成日話：『有錢肯花錢就係財產，如果你死孤寒，一毫子都唔肯花，錢只係變咗遺產』。」

「喺屋企對住四幢牆做咩？」

接近83歲的譚炳文揚言自己從沒想過「退休」兩個字，他說：「我工作慣咗，喺屋企對住四幢牆做咩？返TVB配音，可過日辰，又可以同年青人傾偈，行路搭車，又可以當做運動，喺屋企好悶嘅。」但談及同期出道的朋友，甚至有些後輩也相繼離開這世界，譚炳文慨嘆：「佢哋離開我當然覺得傷感，呂啟文、何雪影等，而林保全都係我帶佢出身，帶佢跟我配電影，可惜都離開咗。」

懶理緋聞

至於被喻為譚炳文的「最佳拍檔」李香琴年前中風後的情況，炳哥表示上年有探琴姐，說：「不過琴姐唔係好認得人喇，見到佢時會『吖，係呀係呀！』其實都唔知佢係咪認得我，睇住佢原本係一個精靈嘅人，依家要喺世界上受難，唉！人生真難估計！」譚炳文指欣賞琴姐待人好，跟他最合拍最有默契，而被與琴姐傳緋聞傳足數十年，譚炳文說：「我唔會理人點講，由人哋去講，當佢哋傻！(炳嫂有冇呷醋？)呷又好，唔呷又好，理得佢吖，都幾十年。我依家唔會有咩目標，嘆多幾年，就活多幾年！」