呢胎係仔？40歲台灣女星關穎宣布再懷孕

現年40歲嘅台灣女星關穎於2013年下嫁老公朱志威，婚後二人育有囡囡「C.C.」，一家三口幸福美滿，最近仲屢傳關穎再度懷孕，今日佢終於公開喜訊！關穎喺Instagram上載外地度假照，仲留言話：「A whole new line up～（全新陣容）」開心宣布佗第二胎嘅消息。

相中關穎着上白色寬鬆衫，腹部明顯隆起，老公仲用雙手輕輕捧住佢個肚，場面溫馨！而囡囡就坐喺粉紅色嘅單車上，對住鏡頭發呆，CUTE到暈！由於「C.C.」旁邊有架藍色嘅單車，似乎暗示第二胎係囝囝，湊成個「好」字。據知，關穎確實陀B仔，預產期喺7月，所以可能會生個巨蟹座或獅子座BB。唔少網友知道消息後，紛紛留言祝福關穎，仲話佢手腳依然纖細，大讚係最靚孕媽咪。