小春雞出院！黎諾懿爆囝囝「請飲茶」

藝員黎諾懿與老婆李潔瑩的愛情結晶品「小春雞」星期一在養和醫院出世，下午黎諾懿抱着BB接太太出院，BB雖然人仔細細，但五官長得標緻，兼且頭髮多多，黎諾懿笑說：「姑娘話我個仔啲頭髮多到要set頭，一睇就知係『馬壯』個仔啦，其實我覺得佢分開每個部位睇係似太太，希望大個都似太太，男生女相靚仔啲。」

「小春雞」請飲茶

黎諾懿近五日努力學習餵奶、換片，他自嘲覺得自己好像智障一樣生手，「小春雞」昨日還向爸爸「斟茶」，他笑說：「尋日幫個仔換片，冇諗過嚟得咁快，兩秒唔使成條水柱射上嚟，冇諗過小朋友嘅力量可以射到咁高，自己都未必有咁嘅射程。射濕我唔緊要，佢射濕自己塊面又喊，老婆教我下次換片要用綿布撳住，坐?落嚟嗰陣都同個仔講『畀畀面，一陣間見記者唔好喊，唔好搞到老竇好似咁生手』，都係第一次成功抱佢冇喊。」

改名有眉目

黎諾懿又指BB改名已經有眉目，他說：「依家用改名apps好方便，噚晚我哋㨂咗個『睿』字，依家差中間個字就會攞去畀師傅睇，我淨係識A至Z，英文名就等太太改。」