被笑大頭蝦　倪晨曦為氹細路花樣盡出

宅男女神倪晨曦（Elva）在ViuTV真人騷節目《全職媽媽放大假》做「阿媽」一星期，負責照顧分別三歲睿睿及兩歲千千，為氹兩兄妹開心，Elva費盡心思每晚講故事氹瞓覺、製作卡通壽司，更舉行親子瑜珈班，安排動物花式瑜珈增添趣味性，連爸爸讚佢盡責可靠，兩、三日就融入家中，擔心佢取代咗自己喺小朋友心裏嘅位置！Elva話教親子瑜伽最重要係一家人增進感情：「我仲做埋拱橋，等佢哋可以捐山窿咁，我都好開心！」

不過，未曾做過真阿媽的Elva亦有蝦碌事發生，其中一日她忘記有Fitting工作在身，匆忙之下唯有帶同兩位小朋友開工，非常搞笑！另一次Elva更忘了帶小朋友牙刷，結果兩位小朋友冇刷牙就返學，千千也不禁直稱Elva係「大頭蝦」，令Elva哭笑不得：「呢樣嘢我都唔知點回應呀！執漏咗嘢，咁小朋友漱吓口一日半日，我都可以接受嘅。」