黃意雅唔扮Rock做自己　闖樂壇有父母撐

新進創作女歌手黃意雅（Cynthia）於初中時期已對音樂有濃厚興趣，在簽約夢想沙龍之前，她與一班做音樂的朋友更合力製作了大碟《Before 23》，她說：「中一、中二開始我就會用電腦錄音，之後又會試吓編曲、後期剪接，所以唔會有好大嘅困難。」她又透露當時為了追尋音樂夢，曾經休學近兩年：「我想試吓自己可以去到幾遠，未試過做一隻碟你唔會知自己可以做到幾多，可能我做咗一首歌就放棄，結果幾好吖，原來自己真係可以堅持到，捱到做完呢隻碟。」之前曾有其他唱片公司向她招手，但因大家的方向不同而未有合作，她說：「可能叫我做啲好rock嘅歌手，我可以扮到好rock，但我想做自己同想係舒服嘅，依家呢間公司就好好。同埋我好清楚自己好想做一個唔係淨係識表演嘅人，可能之後同行內專業嘅音樂人錄音都溝通到，畀到啲意見。」

雖然在香港做音樂前景不太明朗，但Cynthia認為最重要清晰知道自己的目標：「每個行業都有自己嘅擔憂，最重要個態度同知自己想做啲咩，我自己就好想話畀大家聽，其實仲有人識作歌、唱live，仲有一啲好努力而有實力嘅人喺度！」問到父母可有擔心她玩音樂？她指父母知道她一直熱愛音樂，所以非常放心地讓她嘗試做音樂：「佢哋有聽過我嘅歌，會話我邊度唱得唔好，或者抖氣聲好大，佢哋好似傳統嘅父母咁，會比較口硬心軟，但又成日靜靜雞開youtube聽我啲歌。」而大碟中收錄了Cynthia在23歲前創作的作品，其中一首歌《失散》是講述她因太專注做音樂而忽略了朋友：「有一日下晏突然好掛住一個中學朋友，以前係孖公仔嚟，但可能我太專注做音樂，佢約我食飯我又出唔到去，所以我希望大家如果想見就不如直接行動。」

Makeup：Jessica Leung

Hair：Steve@HAiR