為照顧患肝癌羅家英　汪明荃主動提結婚

藝人汪明荃（阿姐）將於8月在紅館舉行兩場紀念入行50周年演唱會，阿姐接受梁泰來電台訪問，大爆當年因拒簽悔改書而痛失電影巿場的經歷，79年阿姐與爾冬陞拍罷《圓月彎刀》一片後，更绝迹電影圈，阿姐親述這與當年香港電影圈在台灣巿場有重要有關，她說：「因我喺內地出世，十歲先嚟香港，呢啲係政治問題，當年拍完爾冬陞嘅《圓月彎刀》後，咩宣傳我都冇份。當年台灣巿場對香港電影好重要，台灣方面竟然要我簽悔過書，但我冇簽！因為我唔覺得自己有錯，結果以後有台灣市場嘅電影，我都唔能參與。」

為從政十年不能拍劇

沒有電影拍，阿姐不覺是挫折，80年代她獲選為人大代表後，不能拍劇十年，她說：「冇諗過如果唔從政嘅話會點樣，我憑自己良心做嘢，冇諗到後果。開頭都唔知道唔能夠拍劇嘅原因，只係以為新人輩出、要接班！唔覺得係咩挫折，咁啱嗰時羅家英搵我做大戲，我就試吓，就咁就學咗粵劇！我本身鍾意拍劇，但日日拍都攰嘅，我認為做人唔好咁死板，呢條路唔走得，可以行第二條路嘅。」

家庭事業難平衡致離婚

汪明荃有過兩段婚姻，她在1971年與首任丈夫劉昌華結婚，不少人指阿姐與感情上也是強者，她形容自己愛情上一直尋求穩定，至於當年與劉昌華離婚，與她事業心強亦不無關係，她說：「當時我的確放咗好多時間喺事業，嗰時丈夫同奶奶已經好好，都畀我好多自由，但我就一直追求事業嘅成功，因為咁好自然就疏忽咗，始終家庭係需要維繫嘅。」她亦大讚前奶奶為人開明不保守，讓她最初一星期做一次《歡樂今宵》，但之後被人發掘是拍劇材料，工作接踵而來，阿姐感慨說：「當時，家庭同事業係好難取得平衡。」

明白一張婚紙重要

汪明荃與羅家英88年開始交往，羅家英多次公開求婚均被拒，及至2009年二人忽然於美國拉斯維加斯秘密註冊成為夫婦，阿姐形容對婚姻概念的轉變，與羅家英04年發現患上肝癌無關係，她說：「其實我哋都有共識，都覺得一張婚紙重要，中國人傳統都係需要名份，佢亦係傳統男人。」她更大爆當年羅家英抗癌時，她主動向羅家英提出結婚：「我話：『不如等我照顧你啦！』又唔係我求婚嘅，見佢咁慘，哈哈！」當年家英的肝癌手術亦令阿姐擔心，她說：「嗰時唔知手術咁大，都割咗（肝）好多有7吋啊！都驚失去佢，始終大家行咗咁耐，都係一家人嚟。」她坦言與羅家英的關係亦影響到阿姐對人生看法：「佢休閒啲，我就比較緊張，所以有時都考慮吓佢嘅生活睇法：有時都係想達到目的，中間唔使畀到自己這咁大壓力，可以開心啲去做。」