曾勵珍特別照住曾守明：佢反而想做多啲

無綫高層曾勵珍、劉丹、林漪娸、黎瑞恩、蔡立兒、麥家瑜等現身器官捐贈活動，接受訪問時，曾勵珍表示無綫前年已經舉行大型活動呼籲藝人簽器官捐贈卡。提到藝人曾守明於凌晨時分離世的消息，曾勵珍直言剛剛才收到消息，謂：「有啲唔開心，之前都見過佢，仲有講笑。 佢之前有拍《愛回家》，大病之後瘦咗一排有肥番，人生就係要好好把握。（係咪因為工作量太多？）我哋都有就住佢，盡量畀啲輕鬆啲嘅工作，反而係佢話要做多啲。」曾勵珍指會特別更關注年紀較大及小朋友藝人。

澄清岳華休養中

至於提到馬海倫表示冇咗岳華消息一個多月，曾勵珍直言：「唔係！人哋喺自己屋企休養緊，真係多事！佢喺香港冇開工都返加拿大㗎啦！大家唔好咁多揣測，上次佢返嚟都見佢好精神，我哋間中都有聯絡，對上一次係個零月前。」而林漪娸就表示都有跟曾守明合作過，印象中覺得對方好開心，好專業。

劉丹否認楊冪再懷孕

另外，問到劉丹有關新抱楊冪是否再度懷孕？他表示不知道。提到楊冪被拍到現身母嬰健康中心，他說：「佢話去參觀，好似有新戲要拍，做資料蒐集。（係咪因為未夠三個月唔講得？ ）我冇收到通知，即係唔係啦。（心唔心急？）隨緣啦。」