吳卓羲公開減肥秘方　原來靠食辣？

藝員吳卓羲（Ron）雖然已離開娘家無綫，但早前就落實為無綫姊妹公司邵氏拍劇，與苗僑偉、黃宗澤（Bosco）等合作演出投資過億的大製作合拍網劇《飛虎極戰》。而Ron已秘密練兵幾個月，至今勁減十多磅，準備在劇中以最佳狀態示人。Ron透露由收到網劇邀請開始，即下定決心要努力操肌：「因為三哥（苗僑偉）、Bosco都好fit，所以自己都要操fit，已經鍛鍊咗一段時間，暫時以跑步為主，亦有健身，但我唔係刻意練大隻，只係想騷身材時會好看啲。」

笑言略有成果的Ron，日前更在微博上載半裸自拍照，短短兩日已有超過5000個讚，認真厲害，不過Ron卻未滿足：「暫時減了十多磅，目標是多減10磅。」雖然離目標還有距離，但Ron已承諾適當時候會騷肌：「努力儲腹肌中，儲齊會騷畀大家看，哈哈！」問到減肥期間可有配合飲食，Ron竟公開獨家秘方：「我覺得食辣有助減磅，因為能加快新陳代謝，燃燒體內脂肪。」

今次在《飛虎極戰》飾演飛虎隊，除了要有弗爆身型，更會挑戰大量動作場面，問到Ron可會感吃力？曾被網民戲稱為「無綫御用警察」的他表示：「過往曾經多次飾演警察，例如《學警》系列、《忠奸人》等，在動作場面上有經驗，所以應該難唔到我。」Ron又表示希望演出動作場能以親身上陣：「但依家已非十幾廿歲，所以會較以前錫身，盡量做足保護措施，初入行時，我恃住自己年輕，就算由高處跳落地，都唔會戴護膝，令膝蓋到依家仍然有舊患。」