張兆輝悼念曾守明：問監製有咩可以幫忙

藝人張兆輝、陳瀅及張振朗到油塘宣傳無綫熱播劇集《全職沒女》，司儀林淑敏介紹演員出場時，提到早前在內地登台期間離世的同劇演員曾守明，她說：「司徒康健（劇中曾守明飾演的角色）嘅精神同我哋一齊！」

提到故友張兆輝感觸地說：「我同守明識咗好耐，我諗藝人都想將佢最好嘅一面帶畀觀眾，相信守明都一樣，最近網上流傳佢出事嘅片段，都有朋友send畀我，希望大家唔好再轉發。（有冇聯絡曾太，睇吓有咩可以幫手？）我同佢唔熟，但都有同監製講，睇吓有啲咩可以幫忙。」

唔會阻止阿女入娛圈

談及劇中難忘情節，張兆輝說：「同張達倫有一場戲，講我盡吐心聲，自己幾鍾意亦都幾難忘，拍嗰陣導演話要拍幾個take，我話感情戲喎，拍幾個take？佢話咁樣可以豐富啲！後尾監製都話場戲做得好精彩，我都會睇番，好似係聽晚播出。（同陳庭欣裸背嗰場戲相比，邊場戲難演啲？）各有唔同嘅難處，嗰場戲佢雖然裸背，但都有嘢遮嘅！（太太同阿女有冇捧場？）有呀！個女搞掂啲功課都會睇，佢鍾意睇我喺電視度出現。（佢對你有咩評語？）佢話OK！（佢想入演藝圈？）作為父親我唔會限制佢，但大前提係要讀好啲書先。」