巴哈馬音樂節貨不對辨被取消　樂迷滯留暈倒

提起音樂節，點都聯想到樂迷、酒精、陽光、音樂與辣妹等「基本組合」，成個「有Cake有糖、有仔有房、有獎抽有女溝」嘅熱鬧場面出晒嚟，不過近日有班樂迷就勁唔好彩，一擲千金去到由美國音樂人Ja Rule於巴哈馬主辨的音樂節「Fyre Festival」，驚見現場成個難民營一樣，完全貨不對辨，一句唔該仲取消埋，大批樂迷滯留小島！

「Fyre Festival」今年係第一年舉行，一般門票由1000美元（約7778港元）至1200美元（約9334港元）不等，包機票的套票更叫價到13000美元（約10.1萬港元），大會事前拍攝的宣傳片仲搵來人氣索模Bella Hadid、Hailey Baldwin與Emily Ratajkowski等於巴哈馬戲水，講到帶粉絲享受非凡又豪華體險咁，不過音樂節於本周五開鑼，現場被發現與宣傳廣告大不同！

盤點音樂節走樣位：

－俾樂迷入住的地方係之前於救災行動用過的帳篷

－啤酒架空空如也，推銷美食為兩塊麵包配兩塊芝士

－現場廚房與一般露營煮食設備無異

－儲物櫃冇鎖

－場地未完成，有大堆垃圾

－野狗與老鼠周地走

大會最後於周五晚上7時多公布音樂節取消，表示基於不能控制的因素，大會要將音樂節延期，話會安排樂迷安全離開小島，希望大家忍耐與合作，亦將安排退款事宜。Ja Rule就堅稱事件唔係騙局，又話搞出呢個一塌糊塗音樂節並非佢嘅問題，但亦表示會負責任！另外，一班載樂迷由美國洛杉磯搭飛到小島參加音樂節的航班，有空姐於乘客上機後，宣布由於小島已經太多人爆滿，為乘客與機組人員的安全而要取消航班，令樂迷「驚喜」一浪接一浪！現場不少人滯留，於社交網上載現場混亂又惡劣的情況，有人分享被困機場又缺水缺糧的場面，仲有人當場暈倒，後來有工作人員開門令空氣流通才冇事！