謝茜嘉36歲生日　老公女兒Sweet爆慶祝

荷里活靚媽謝茜嘉艾芭（Jessica Alba）唔經唔覺前日已踏入36歲，不過依然Keep得好省鏡，而近年幾乎已全職投入搞生意同湊女嘅佢，就獲兩個寶貝女8歲大Honor及5歲大Haven甜蜜祝賀，於社交網上晒溫馨。

謝茜嘉留言祝自己生日快樂，話估唔到兩個寶貝女原來咁花心思準備了愛心早餐畀佢一朝早可以坐喺床上慢慢食，仲親手畫咗兩幅畫送畀謝茜嘉，其中一幅仲係謝茜嘉嘅肖像，一頭啡髮、戴住眼鏡，都有幾分似。咁樣都未夠，謝茜嘉之後仲上載了成間房都滿布粉紅色汽球的照片，玻璃窗上貼了「生日快樂」的裝飾橫額，受寵若驚嘅佢都開心到O晒嘴。除咗兩個寶貝女之外，當然唔少得結婚9年嘅老公Cash Warren，於社交網上載二人恩愛合照，打咗成篇勁冧嘅文，留言：「文字都不能足以形容首次跟你見面的感覺。」