《教父》45周年展映　眾星最強列陣

荷里活影星羅拔迪尼路（Robert De Niro）有份創辦的Tribeca電影節連日於紐約舉行，羅拔密密撐場之外，近日更與阿爾柏仙奴（Al Pacino）及羅拔杜華（Robert Duvall）等《教父》（Godfather）系列拍檔現身，為電影45周年展映聚頭出席座談會，6位《教父》影星加上導演哥普拉（Francis Ford Coppola）重聚，令粉絲大為驚喜！

片中眾星現身，「Michael Corleone」阿爾柏仙奴（Al Pacino）、「Sonny Corleone」James Caan、「Tom Hagen」羅拔杜華（Robert Duvall）、「Vito Corleone」羅拔迪尼路、「Kay」戴安姬頓（Diane Keaton）以及「Connie Corleone」Talia Shire齊集，仲有精神奕奕的哥普拉！

眾人大講電影試鏡及拍攝經過，當中包括哥普拉指電影公司本身嫌阿爾柏仙奴太矮而唔想搵佢參演，在場的阿爾柏仙奴即笑言：「矮都係事實」，場面搞笑，不過哥普拉就自言好堅持，仲話見完對方之後，次次諗起個Michael角色都係諗起佢，仲搵佢試咗好多次鏡，試咗N次再打俾阿爾柏仙奴時，被阿爾柏仙奴當時的女友鬧爆：「你搞緊咩呀？你折磨緊佢！」

哥普拉另講到電影公司亦唔俾佢起用馬龍白蘭度（Marlon Brando）做主角，因為對方當時出名難搞，但佢又堅持起用馬龍，電影公司要佢搵對方試鏡而且擔保唔會搞事，哥普拉一口答應，仲憶起馬龍試鏡時火速入戲，甚至試鏡時電話一響，馬龍都仍然入晒戲用戲中聲線語調講電話，正式拍攝時更盡用現場資源，包括片場的貓，就係咁就拍出貓坐大脾的經典場面，哥普拉仲話當時嗰場係一Take過搞掂，令全場大為驚歎！

此外，哥普拉亦講到自己都曾經坐唔穩「導演位」，片場有12個人成日不滿佢嘅決定，包括搵馬龍做主角，佢一怒之下一口氣炒咗呢12個人，仲話：「你問我有冇權咁做？我都唔知！」惹來全場爆笑！