閻奕格撈過界想演戲:做醜女都冇問題

20170504
東網電視
更多新聞短片
Janice早前完成音樂劇《風雲5D音樂劇》。

唱得之人閻奕格(Janice)早前剛剛完成了音樂劇《風雲5D音樂劇》,劇內飾演孔慈一角大獲好評。接受訪問時,Janice直言首次演戲難度非常高,雖然有很多人都覺得自己歌手的身分要唱歌一定冇問題,但音樂劇跟唱流行曲有很大分別,謂:「如果平時唱歌一定會要求每粒音都唱到完美先肯收貨,但係做音樂劇需要好多感情,好似有幕係我要死,要唱到好似冇氣咁,其實係好難。真係好大壓力,我係咁多演員中唯一一個冇演戲經驗,同時又冇得NG,又怕會甩詞。個個都咁好戲,咁有份量,真係會怕成為大家嘅負累,如果我做得唔好會好礙眼!」

新碟唔玩飆高音

演戲初體驗的Janice,表示日後好想嘗試接拍電影或電視劇,仲自爆由細到大一直都好恨做戲,因為兒時迷上由趙薇和林心如所主演的電視劇《還珠格格》,笑言:「好想做格格!自己本身性格都係好男仔頭,咁啱孔慈個角色好女人,所以好想演古裝! (會想試吓演音樂電影?)當然想!係每個歌手同演員嘅夢想,係好大嘅挑戰,如果真係有機會一定會把握!咩都想試,演醜女都絕對冇問題。」另外,談到音樂方面,Janice指特別為《風雲5D音樂劇》而延遲推出個人專輯,而風格都跟過往飆高音的唱法都有所改變:「以前參加比賽會有啲show off技巧,但係人大咗就會想以說故事嘅方式去唱。」

服裝: PENNYBLACK
髮型: Haysses Ip @ HAiR
場地: 如心艾朗酒店