怕有後患　王若琪唔敢隨便公開戀情

歌手王若琪（Takki）最近以中性形象推出歌曲《世人笑我太瘋癲》，她覺得歌曲代表了自己的愛情觀：「無論咩戀愛都好，好似呢首歌講，我覺得係一個人就得。首歌係講不被世俗認同嘅戀愛，身邊好多朋友有唔同嘅關係，佢哋都好開心。」不少人曾問她如果拍拖會否公開，她認為公開不是問題，但擔心日後真命天子可能看到前度的報道，因此想在開花結果時才公開。

問到拍過多少次拖？Takki笑言有些人不想記得就會不記得，但次數不算多：「貴精不貴多嘛，我諗大家細個都一定經歷過你Hurt人、人Hurt你。」她表示之前拍攝微電影《失落記憶》，主題關於賣走不開心的回憶：「拍完之後我諗咗好耐，如果有人對我唔好，我會唔會想賣走啲記憶？其實唔會，咁先會令自己做一個更好嘅人，畀人Hurt過，自然就唔會Hurt人咁多。」雖然她不想記得某些人，但她認為那些人令她進步和變得更好。