唐詩詠被王浩信爆結婚:等我招呼吓佢
藝人唐詩詠與男友洪永城近日傳分手,兩人日前回答感情問題都支吾以對,今日詩詠與袁偉豪、黃長興及朱晨麗等到將軍澳電視城出席新劇《棟仁的時光》造型及拜神,劇中飾演救護人員的她透露跟其他演員有人工呼吸的場口,問到現在拍親熱戲是否可更輕鬆? 她說:「做演員要放低,係劇情一部分的話我唔介意。(唔使同人交代?)不嬲同自己交代。(冇感情包袱?)唔講喇!(你同洪永城冇見幾耐?)唔講喇!以免多揣測。」

唐詩詠又透露跟洪永城有聯絡及良好溝通,兩人有共識,在適當時候會向大家交代:「多謝大家嘅關心。(王浩信話你去咗結婚!)佢咁多事,等我招呼吓佢!(段感情係樂觀?)人生都係樂觀,就算有辛苦嘅嘢都過去,都要樂觀,無論點都係成長。(近排有冇喊?)冇拍喊戲喎!(你畀人影到同一班女仔出街,係咪訴苦?)有男有女嘅,識咗十幾年,係慶祝生日 。(感情問題同結婚有關?)劇集還劇集,加埋我啲經歷,大家會混淆咗,但唔存在呢個問題。」