名人：仔仔係咪霸！諸葛紫岐唔阻入行

為事業打拼常四圍飛的名媛諸葛紫岐，在昨日母親節當然和三歲的愛兒薛華韜（韜韜）共度。諸葛接受東網電話訪問，指最冧的是韜韜不單送上熊仔蛋糕，期間十分溫柔的走近她的身邊並咬耳仔說：「我講一個秘密畀你聽，I love you！I miss you！」令諸葛冧爆非常！韜韜盡得父母優良基因，為其中一個矚目的星二代，年紀少少已成為廣告寵兒，據知有不少廣告商包括童裝、奶粉等向他招手，諸葛也承認曾經推卻一個七位數字酬勞的食品廣告，她說：「個廣告係要同韜韜母子檔上陣，最後推咗，因為想佢專心讀書。如果係為慈善就冇問題，好似之前我哋一家三口去慈善活動，齊齊上台唱歌，令仔仔知道助人為快樂之本，就算只係做少少嘢，幫到人或宣揚到助人嘅訊息，都係值得。」

韜韜志願做醫生

問到是否反對韜韜入娛樂圈，諸葛和老公原來持相反意見，諸葛說：「韜韜入唔入行，我覺得冇乜所謂，唔會畀太多限制佢，佢想做乜係佢嘅選擇，係佢嘅life，最緊要係佢開心。老公反而唔係咁想佢咁多曝光，就算有時我哋成家出席活動，都係畀仔仔見識吓。因為老公思想傳統啲，覺得男仔要兼顧好多責任包括做好自己、照顧家人等，佢認為仔仔依家嘅責任係要專心學業，都想佢將來做一個生意人。暫時韜韜嘅志願係做醫生，佢話醫生可以幫到人。」

勁叻襯衫

諸葛笑言韜韜有表演欲，尤其對唱歌最感興趣，是家中的「咪霸」外，更是她的形象指導，她說：「韜韜知道唔同場合要着咩衫，唔係因為貪靚，而係對場合嘅尊重。好似爺爺嫲嫲生日，佢自己識得去揀紅色衫，又親自唱生日歌。我有時去超市買嘢着得hea啲，佢都會叫我着得整齊啲，唔好好似喺屋企咁短衫短褲！佢見我化妝set頭就知道我要去活動，如果帶埋佢去，佢會要求着西裝。」