被指同C君撞樣　吳業坤籲關注髮線

歌手吳業坤、胡鴻鈞、陳庭欣、翟威廉、JW等於尖沙咀出席記者會，講到坤坤被指與C君撞樣而頻頻被戲稱為C君，坤坤笑說：「自己睇番都覺得好似，大家都有少年額，今次我知名度又會提升，希望大家關注髮線，畢竟我都踏入中年。（搵髮型師打救？）冇，所以我一直用呢個髮型，或者之後試吓植髮！（唔抗拒？）唔會，我都想做代言人，不嬲唔怕暴露自己弱點！（搵C君合作？）一直都想，希望佢睇到報道畀我聯絡佢啦！」

而胡鴻鈞表示正忙於宣傳新歌，講到許廷鏗離巢以及鄭俊弘被雪，或有機會搶先開騷，他說：「唔好咁講，等公司安排。（知唔知許廷鏗工作方向？）留番畀佢自己講，身為好朋友要畀番空間佢。（擔心佢？）唔擔心，成熟嘅人識點處理。（唱片公司老闆何哲圖叫佢之後要靠自己？）做呢行好多嘢都靠自己，呢句其實中肯。」問會否小心處理感情事避免鄭俊弘的遭遇？他表示：「未有機會，呢家感情真空緊，依家係專注工作。」