尊尼特普唔介意頂替艾力扮特朗普

荷里活男神尊尼特普(Johnny Depp)昨晚出席新片《加勒比海盜:惡靈啟航》(Pirates of the Caribbean: Dead Men Tell No Tales) 在荷里活杜比劇院舉行美國首映禮，同場有拍檔奧蘭度布林(Orlando Bloom)及哈維亞巴頓(Javier Bardem)等。而尊尼較早前上名咀艾倫迪珍妮絲主持的清談節目受訪，曾在搞笑短片中扮美國總統特朗普(Donald Trump)嘅尊尼即場扮特朗普把聲搞氣氛，佢話自己無睇過艾力寶雲(Alec Baldwin)喺《周末直播》(Saturday Night Lives)扮特朗普，艾倫即表示好震驚竟然無睇過，並提議如果艾力唔再喺《周》扮特朗普，可以搵佢頂替。尊尼應承並笑言只要抄晒艾力點做就得。而艾倫喺節目中狂問尊尼嘅私人問題，包括最鍾意身體邊個部分?鍾唔鍾意自己嘅屁股?最鍾意邊個粗口字?等。

另方面，導演溫子仁昨日公開尊尼前妻影星安芭赫德(Amber Heard)喺新片《水行俠外傳》(Aquaman)中嘅Mera首個造型，而安芭嘅疊水新男友馬斯克(Elon Musk)亦有喺社交網貼女友造型照以示支持!