跳出新境界！林雪360度爆笑碌地跳街舞

藝人林雪因搞笑形象被網民捧為「男神」，其實佢唔只好叻發放笑彈，仲唱得又跳得㗎！你冇睇錯，係跳得！皆因早前喺ViuTV音樂節目《林說金曲》，林雪跟導師學跳肚皮舞，點知零舞蹈底子嘅佢勁快上手，仲自創獨特嘅「肚腩舞」，相當有天份，難怪網民都話舞王之位非佢莫屬啦！呢位新舞王尋日又再挑戰跳舞，今次唔係跳佢拿手嘅「肚腩舞」，而係街舞！

喺《林》新一集，林雪向前EO2成員Otto（王志安）學跳Break Dance（霹靂舞）！一開始Otto教授基本舞步，但林雪睇到目瞪口呆，仲「天然呆」企定定喺度，好彩醒目嘅佢好快跟到舞步（好似係）！之後難度再升級，Otto示範蹲下再快速跳起身嘅舞步，睇落好Easy，但對林雪嚟講喎，玩咩？有個大肚腩嘅佢踎低咗唔只見頭暈仲腳震震，企番起身都要時間啦，仲要跳咩！喺「慢鏡」之下，林雪終於起得番身，成個慘樣嘅佢自爆上半身有成200幾磅呀，搞到佢都要開口話學第樣先啦！

終於學有所成，自然要驗收成果，林雪同Otto即場「師徒對決」，Otto首先進擊，大跳高難度地板動作，睇到嘩嘩聲！隨後到林雪反擊，先嚟一個Wave動作，壓軸表演「360度轉體大翻身」簡稱「碌地」，最後仲擺番個Break Dance招牌動作翹手Pose！表現難度咁「高」加埋氣勢同創意，冇理由唔贏啩？就連Otto都甘拜下風拍晒手，一班網民都大讚林雪「叻叻豬」呀！

網民有話兒：

SiuXXXene：肚腩仔好打耳。

XXXcoAy：無啦啦碌地，想笑死人咩！

XXhenaCheXX：新一代舞王，好正！

TessXXX：呢個都好好笑，係咁話「拳頭呀拳頭呀」！！！