李克勤幫梁榮忠打通關係返無綫出騷

歌手李克勤與梁榮忠到華仁書院，出席「李克勤30周年演唱會校園Live」綵排，克勤在師弟鋼琴伴奏下唱出《我不會唱歌》。克勤表示點名要梁榮忠參與節目，他說：「梁榮忠都好耐冇喺無綫出現，我同無綫中層講要搵梁榮忠做呢個節目，佢哋話：『咁呀！』後來我打電話畀高層余詠珊，佢話：『等等先！』後尾覆我OK！（你幫梁榮忠打通咗關係？）我打通咗個電話啫！睇吓9月我演唱會嗰陣，梁榮忠得唔得閒過嚟幫手，唔好唱歌就得㗎喇，可以幫手度吓嘢。」

克勤自爆為演唱會犧牲不少，他說：「本來我今年應該去澳洲睇一個世界級嘅羽毛球賽， 依家為忙演唱會去唔到。（叫太太代你去？）其實係中國女子羽毛球運動員趙芸蕾同我太太聯絡，邀請我哋去澳洲睇比賽，依家去唔到，惟有喺遙遠嘅香港幫佢哋打氣。」

梁榮忠拆解自己在TVB失蹤之謎，他說：「其實我去咗做旅遊達人，我想好似80年代啲去法國寫劇本嘅編劇咁，我呢度去、嗰度去，寫吓劇本。（克勤點名令你可以重返TVB？）其實我想講，今年係我同克勤合作25周年，只要係『克勤』呢個名，我都會到。（會幫手做演唱會嘉賓？）既然克勤唔畀我唱歌，咁我跳舞囉！」