因錄音室　張敬軒獲頒人生首個博士頭銜

歌手張敬軒（軒仔）首度披上畢業袍得到「法國北歐大學榮譽商管博士」，獲頒人生首個博士頭銜，大學創辦人兼校長Professor Adlan Parsa與及高級教學主任Professor Gary Robinson更遠道由法國來港頒授學位證書。

揀上追夢之路

軒仔開心表示音樂是自己的一生摯親，由中學時期趁暑假去唱歌賺零用錢，到成為歌手再搖身一變做埋錄音室老闆，自覺十分幸運。軒仔說：「當初爸爸出於現實考量，希望我選擇一條踏實嘅路，所以中學之後我所修讀嘅學科係同銀行業、會計及工商管理有關；但最後我都係決定畀自己一個追夢嘅機會，投身樂壇，用五年時間去決定我嘅終身事業。」因為不是人人都鍾意自己份工，能夠造到屬於自己的音樂，軒仔倍覺感恩。

大學認同軒仔管理方法

到後來開辦錄音室時，學過的知識即大派用場，張敬軒說：「我好相信，活出圓滿人生，係要不斷求突破、求進步。呢幾年，我開始實踐一直以來嘅音樂夢想，就係開辦錄音室。由用家到自己投資、做老闆，睇嘅嘢真係好唔同，令我眼界大開。要特別感激我嘅團隊、一班戰友，我人生第一間錄音室喺成立第二年後，就登上全球20大錄音室之一，而能夠被法國北歐大學商業管理系認同我的管理方法，我真係好開心，亦好感恩可以得到榮譽商管博士呢個名銜，坦白講我冇諗過會有一日可以叫自己做『張博士』。」

多謝老闆

當日場內，一班公司同事亦抽空到場分享及見証喜悅，更準備了蛋糕和鮮花祝賀「張博士」，軒仔笑指：「好開心公司各位兄弟姊妹今日到場，樂壇頒獎禮去得多，可以同班戰友經歷咁重要嘅一刻，份外有意義；我仲想特別多謝老闆楊受成博士，佢畀咗我好大空間去拓展工作以外嘅追尋，同埋發展另一個人生。嚟緊我會繼續不斷突破自己，希望可以為樂壇、為歌迷帶嚟新嘅音樂體驗。」