狼虎之年！梁嘉琪姣冧意國型男

之前意大利靚仔博士、「地表最帥數學教授」博塞利（Pietro Boselli）來港拍廣告，掀起全城熱話，皆因佢唔只有腦，仲有事業線（42吋胸肌）同人魚線，難怪唔少港女見到都不禁「心心眼」啦！最近，博塞利有個靚仔同鄉都嚟咗香港，就連已封盤嘅「是非精」梁嘉琪都畀佢冧爆，仲冇視男友偷偷地同人「約會」添！

男友會唔會嬲嬲哋

嘉琪男友又唔使嬲嬲豬先，其實嘉琪同呢位意籍型男只係合作拍攝短片，冇對你唔住（應該係）。片中所見，意籍型男化身老師教講意大利文，講咩自然唔係重點，因為嘉琪一見到人地已經暈晒浪，仲全程含情脈脈、眼甘甘咁望實對方，完全掩飾唔到臉上嘅冧樣，連網民都嗌佢收歛啲，仲好唔畀面叫嘉琪唔好咁快發姣嚇親人，認真搞笑。

FF手上杯意啡

嘉琪仲有幸同型男老師歎咖啡，嘉琪即時化身高貴港女優雅地飲嘢，同平時嘅佢差好遠。期間嘉琪終於按捺不住出動，仲嘟嘴索吻又「抽水」，咁狼死？好彩佢只係ff手上杯意大利咖啡係型男老師，對住杯咖啡又摸又錫啫，但嚇到人地口口擘，唔知嘉琪男朋友睇到唔知會唔會嬲嬲豬呢？一班絲打們就力撐嘉琪，話有養眼嘅靚仔喺面前，又真係好難唔「心心眼」兼表現瘋狂，仲有絲打大膽地留言問攞contact添，相當進取！

網民有話兒：

XXXlaiWong：咁靚仔咁型，比着我都對住佢心心眼啦！

ChiXXXhan：嘉琪冷靜啲，收番你啲口水先，唔好咁快發姣哈哈。

HinTsuiXXX：求條片個阿sir嘅contact！！！

XXdaLamXX：靚仔＋戴眼鏡＋講流利意大利文，真係好正。