教你新港女三式!撒嬌高Ling攞你命

20170526
東網電視
更多新聞短片
Well~真係攞你命三千!
周不時網上都有愛情專家教大家,如何成為人見人愛嘅「港女」?最基本就要學識三句「金句」,分別係「點解嘅?」、「真係㗎!」同埋「你好叻呀!」早兩年有吳若希親身示範,依家佢已然榮升一女之母,唔通真係咁有效?呢日就輪到高海寧(高Ling)示範,佢為See See TVB Facebook Page拍咗段撒嬌三大招嘅片,港女「金句」加埋迷人笑容,迷到大家暈一暈,各位網友準備接招啦!
招招你要識
高Ling最近憑無綫劇集《不懂撒嬌的女人》嘅田蜜彈起,劇中高Ling使盡渾身解數,賤招盡出,睇到觀眾咬牙切齒!不過現實中,高Ling就sweet到漏,片段撒嬌三大招,一嚟着住跌膊衫嘅高Ling就做出cute到暈嘅樣,問大家「點解嘅?」,網民即刻話高Ling問咩都會為佢搵出答案!不過撒嬌嘅高Ling竟然畀幕後工作人員笑佢係「只懂詐嬌嘅老臨」,認真大膽,難得高Ling唔介意,仲笑得勁開心,夠晒親民!
第二招,高Ling楝高隻腳,輕撥秀髮,散發住濃濃嘅女人味,佢對住鏡頭嘟嘴錫錫,仲咪晒眼,一臉陶醉咁話「你好叻呀!」,試問邊個會頂得順!但有網民就話高Ling詐嬌不成,搞笑有餘,大家又點睇呢?
教埋你扯高八度
嚟到最後一招,亦係最高難度嘅一招,就係點樣用高八度嘅聲,好嗲咁問「真係㗎?」,高Ling問完之後,低頭甜甜一笑,又成功過關!正當大家都畀高Ling電到暈陀陀嘅時候,有網民就一句帶大家返回現實,「鄧智偉你就好啦!我恨你!」,係喎,現實中,可以親眼睇到高Ling撒嬌嘅人,可能只有佢嘅緋聞男友鄧智偉,這些機會……
網民有話兒
Chxxxxxn:觸電十萬waTT、無得救!
Chxxxxg:打冷顫
Fixxxxxxg:點解我會笑咗出來XDD
Uoxxxxl:鄧智偉你就好啦!我恨你!
Yvxxxxxxc我暈喇!