首出單曲　簡淑兒擔心咬字唔正

組合少女標本成員簡淑兒（Jessica）到電台宣傳她首支單曲《我不是女神》，她表示最近與另外兩位成員較少見面：「佢哋喺內地，得我留守香港。（自己一個驚唔驚？）平時有人傍住，互補不足，依家要自己努力。（擔心有咩不足？）咬字，之前有人分擔，冇咁執着，可以抖吓。」她坦言可以想像到唱現場時會超緊張和手震，但感到歌曲屬於自己：「歌詞度身訂造，收到都好感動，但壓力好大，唔想嘥咗首歌。」

Jessica自言不是女神，亦覺得很多人都會認同：「我都係追求好簡單嘅愛情。（有冇對象？）冇呀，成日都叫人介紹畀我。（叫隊友Coco介紹筍盤？）我有問，但冇呀，佢好忙，同埋佢女仔朋友多啲，如果做媒人佢都要過濾過。」問到有否擔心像其他女團一樣因爭仔反目？她指暫時沒有，亦慶幸3人擇偶條件不同：「我鍾意嘅Kabby唔鍾意，我鍾意成熟同暖男嘅，佢鍾意陽光啲。」另外，Jessica自言最近日間宣傳，夜間拍劇，笑稱有時差。