呃老婆先有親熱戲拍？秋官：我話係被迫

藝人鄭少秋（秋官）於紅館舉行兩場《鄭少秋半世紀．大時代世界巡迴演唱會》嘅尾場，秋官去到慶功宴時，喺台上再次感激囡囡鄭欣宜（Joyce）推掉工作嚟到做嘉賓，更大方多謝太太官晶華：「我老婆佢乜都管，乜都跟乜都睇，一陣講得多咗又話我架喇，好多謝佢照顧我，有個好老婆係好嘅！」秋官就表示開兩場演唱會「夠晒皮」，不過就笑言計劃開拍part2。問到會否同Joyce慶祝生日，秋官直言已經約了女女食飯慶祝：「唔係正日，但會食飯。（佢正日同男朋友過？）佢好忙，又咁乖嚟咗，仲搞咁多嘢咩。（會關心佢依方面？）唔問架，女係唔鍾意你問依啲嘢架，我有幾個女點會唔知呀，佢鍾意畀你知你就會知架啦。」提到會否想再同3個「蟹仔」合作拍劇，秋官笑言邵仲衡已經去咗第二個台，其餘兩位都有其他發展，唔知道可以去邊個台先可以三個再合作：「不過係開心嘅，啲人睇到諗返起啲經典場面！（邀請佢哋同你一齊登台？ ）要主辦諗吓，同佢哋book個期。」

至於問到點解唔喺台上面多謝老婆，秋官坦言老婆好低調，搞笑謂：「可能係驚我講錯嘢，或者講嘢唔得體，睇吓點囉。（留番part2講？）講佢？要爆陰毒先得，畀佢知佢實拒絕，如果有人撩就講，咁就係被迫，好似我以前拍親啲親熱戲都係話被迫。」談到係握手期間有熱情粉絲錫面珠，問到老婆睇到會唔會呷醋，秋官指歌迷都係仰慕或者愛慕自己，呢個表現係好純潔。另外，當講道秋官跳舞勁過羅志祥，秋官即笑言自己年紀大對方一半，問到幾時開始排練，秋官話：「由三月開始逐啲練，講真唱到好『行』咁跳舞嘅話，每次練習會好吃力，所以諗吓點樣偷雞。」仲話第一晚張德蘭嚟睇演唱會嘅時候，都諗緊自己係咪對嘴，秋官解釋跳舞同唱歌用嘅兩個力係唔同：「我『chur』你哋唔知啫，演唱會唱嘅歌都幾喘架，encore仲要唱《火燒圓明園》，好難唱架，依家捱過咗都唞啖氣，回想番都幾吃力！有你哋咁講，我就有信心繼續跳落去！」