林盛斌獲邀拍新片！搵碧咸演親生大佬

藝人林盛斌（Bob）近年Job接Job，除咗參與唔少劇集及電影拍攝外，平時仲獲得好多客戶垂青，邀請擔任司儀，可謂豬籠入水！

呢日Bob喺微博甫文，話自己今日遇到個「水份好高」嘅內地中介人，對方有意邀請佢做男二號（主要配角），原本應該好開心，問到套戲講咩時，對方就話：「講你同男主角一號，即係你親生阿哥，兩兄弟由喺街邊炒栗子努力向上到致富嘅故事！」之後Bob就問邊個會飾演佢哥哥，對方回答：「仲度緊，初步應該係……碧咸。」Bob就話笑完十幾秒之後就好客氣咁收咗對方線，仲加咗個標籤「親生兄弟呢下冇得唔笑」，認真抵死！