張智霖做錯咩？靚靚嬲到爆：想一嘢劈佢

藝人袁詠儀（靚靚）於尖沙咀出席荔園茶餐廳開幕禮，同場茶餐廳老闆邱達根亦帶同太太及母親亮相支持。靚靚即場炮製菠蘿冰，受訪時直言荔園為她帶來無限童年回憶，最難忘帶香蕉到動物園餵象。靚靚透露現在每次與囝囝張慕童（魔童）到外國旅行，都會先帶他去動物園遊玩，務求令對方接觸及感受到真實的動物。

爆拍拖時睇戲多

問到靚靚以往到荔園時可有艷遇？她笑言其父親是警察，故冇異性敢埋身。談到她與老公張智霖（Chilam）以前有否到荔園拍拖？靚靚坦言與Chilam由地下情開始，故以睇戲拍拖居多：「我哋睇戲多，唔見人嘛，地下情嚟。依家見得光就可以四圍去。」

想仔仔講多啲中文

提到靚靚一家日前到英國睇球賽，途中仔仔與Chilam開live時因講英文而令她黑面？靚靚解釋只因想兒子多說中文，更搞笑稱嬲到想劈老公：「早餐都未食，兩父子就諗住點樣開live。有時見到啲人去餐廳唔係享受美食，而係攞手機出嚟影，我都比較抗拒。個仔讀國際學校，中文已經唔係佢母語。我平時都淨係同佢講中文，見到佢中文有進步。點知嗰日開live，老公就話英文由個仔負責，我嬲到想一嘢劈佢！呢個係我同老公唯一嘅矛盾。（後悔畀兒子讀國際學校？）冇，佢好開心同正面，知識我交畀老師，但身教都好緊要。」談到日前英國恐襲，靚靚直言留下少少陰影，但不會避忌到當地旅遊：「唔會逃避，因為英國文化好濃厚。如果有需要或者個仔提出都會再去。」

為仔仔學習

問到靚靚會否被兒子視作「虎媽」？她否認道：「唔會。但有時佢問我有啲嘢可唔可以食，我答得嘅時候，佢會話以為我會唔畀。我發現我喺佢心中樣樣嘢都say no，我都要反省。我都臭脾氣，講嘢快過腦，好易得罪人，我都要為個仔學習。」