洪金寶洪天明同台演出　陳嘉上：係巧合

導演陳嘉上到電台宣傳將於周四正式上映的電影《蕩寇風雲》，提到找來洪金寶與洪天明兩父子同台演出，他坦言全是巧合：「好早就決定搵趙文卓，所以要搵個有霸氣，又可以壓住佢嘅人，結果我哋就搵咗洪金寶，同時間要搵另一個角色，有人提議搵天明，我哋覺得佢依家成熟咗，可以演到。」又指天明曾擔心自己演得不好：「每次拍完都同我講『我做得唔好嘅你要講』，我就話如果唔好我唔會畀佢ok。（驚你錫住佢？）都係，我真係由細睇到佢大，但好開心，佢對我嚟講唔再係洪金寶個仔，而係一個演員！」提到有份參演這套戲的日本男星小出惠介，近日被爆涉與未成年少女飲酒並發生性行為，宣布無限期停止所有演藝活動，陳嘉上無奈說：「佢係好好嘅年輕人，酒真係累事，佢今次演得好好，畀咗大家好多嘅信心，可惜一次醉酒嘅事，希望佢好好地企番起身，但日本比較保守啲嘅，真係好可惜。」

問到對電影票房的期望？陳嘉上表示之前已在港試映幾場，觀眾的反應很好，但不期望年輕人會因為抗日題材入場支持，所以不敢想太多，又提到電影早前已在內地上映：「內地唔算太好，有6千幾萬，估計過唔到億，算係輸咗，好彩可以賣到去唔少海外地方，希望可以補足番啲，老闆應該會蝕，希望唔好蝕太多。」但他坦言從導演及觀眾的角度上，覺得自己沒有辜負大家：「內地好多觀眾會主動幫我宣傳，有啲網會話我嘅戲歷史上唔啱，啲觀眾會主動幫我解釋。我喺香港試映咗幾場，個反應好好，我覺得內地票房失利，係同佢哋有太多抗日片有關，香港少啲，呢套戲可能會多番啲佢哋想睇嘅嘢。」