日前獲眾星致敬　戴安事後撇清非朋友

71歲荷里活女星戴安姬頓（Diane Keaton）早前於美國洛杉磯獲美國電影學院（AFI）表揚對演藝界嘅貢獻，不少圈中具份量嘅明星都有出席向戴安致敬，好似幾位金像影后「梅姨」梅麗史翠普（Meryl Streep）、慧絲溫達絲般（Reese Witherspoon）及愛瑪史東（Emma Stone）等，但點知過幾日後，戴安卻上節目逐個「撇清關係」，聲言統統唔係Friend！

戴安被主持人Jimmy Kimmel問到同梅姨係咪朋友，就話：「我愛佢，不過唔係成日見到佢，佢唔會點打嚟，不過我都愛佢！」講到慧絲時，戴安又話：「慧絲有嚟真係好好。我跟慧絲見面時佢得14歲，當時我執導一部電視電影，同佢合作。慧絲只係一個小朋友，不過毫無懸念會成為大明星，又靚又有才華。」Jimmy見戴安兜咁遠再問一句：「不過都唔係朋友？」戴安就不得不承認：「唔係，唔係朋友。我其實冇咩朋友。」