港航延誤12粒鐘　何傲兒直擊躁大媽瞓地

藝人何傲兒（Lily）因香港航空一班原定昨午3時35分由香港飛往北京的航班延誤，而折騰12小時，當中逾百名乘客困在機艙8小時而惹不滿，有乘客鼓譟、更有大媽瞓地抗議，亦有人報警，最後凌晨兩時許才起飛。

而當事人之一的Lily接受東網訪問，她表示原本昨日乘坐飛機到北京出席今日的活動，但飛機航班改了三、四次，又上機又落機，第四次乘客終於鼓燥，她全程目擊，並說：「大家被困機上，冇冷氣、又有老人家，現場好混亂。第一次延誤機長有解釋因為航空管制同冷氣問題，但之後就冇再講，前前後後咁上機落機，大家等到12點，機長再宣布要凌晨2點會起飛，乘客實在等得太耐所以大為鼓譟，之後又改話10分鐘後起飛，但最後都兌現唔到承諾，乘客聚晒喺走廊投訴，最後我12點幾就同十幾個乘客落機。」

Lily透露曾安撫瞓地大媽及推撞受傷的空姐，她直言：「我都有安撫過瞓地大媽，點知之後佢瞓喺地，始終佢40、50歲瞓地都對身體唔好，警察嚟到之後有問佢要唔要叫白車，佢就話唔使，淨係想返屋企。」

Lily表示作為乘客會不開心，因為折騰了12小時，導致延誤工作無奈缺席北京活動，對客戶抱歉，但亦明白機組人員已經做好本份，大家都感到無奈：「今次係難忘經歷，以開心心情去做嘢，但以另一個失落心情返屋企。」