帶菌者互講印象　個個都讚龍小菌！

歌手龍小菌帶領的樂隊帶菌者接受訪問，問到對結他手阿花的印象，低音結他手阿Mann笑指對方與自己的高度差不多：「音樂上OK啦，冇乜人可以彈到佢啲嘢，個人就比較優柔寡斷，有時講過啲嘢會唔記得。」鼓手阿布就讚阿花好人，不時開車接送成員。小菌亦讚阿花抵得諗：「我有好多嘢唔識，阿花都好願意教我，例如彈結他，阿花同阿布由帶菌者一成立就喺度，認識咗相對耐啲，感情都深啲。」監製阿基指阿花很活躍，做事很快手。

至於對鼓手阿布的印象，阿Mann指初認識時覺得對方很有禮貌和穩重，相處過就覺得對方很謙卑和為朋友：「要佢幫手，有時可能用呻嘅形式同佢講，之後唔記得自己講過，但佢會做啲嘢幫你。」阿花自言認識阿布最長時間，對方以前只會打鼓，但現在懂得關心朋友。小菌表示於帶菌者成立前已認識阿布：「佢個人就固執囉，但都係好事，做音樂同做人都要有啲固執，對應該要做嘅事就要執着。有時有首歌我哋覺得係咁樣做，可能佢個感覺同大家唔一樣，佢就會堅持。佢都會聽大家講，但佢表達唔到出嚟。」阿基形容阿布是溫柔和有趣的人，只要有事想做，就會勇往直前。

說到小菌，阿Mann覺得她是很喜歡笑的女生：「識落就覺得佢有啲性格幾男仔，我唔覺得同緊一個女仔夾Band，不過呢個唔係缺點。佢音樂天份好高，所有樂器去到佢手上，唔使半個鐘就會玩到啲似樣嘅嘢出嘢。」阿花認為小菌非常獨立，一有目標就會不停努力：「我哋去台灣之前佢要減肥，佢減到好多，嚇死我！」阿布大讚小菌靚女，又爆她很喜歡行便利店：「我哋去台灣，佢係瘋狂行，有便利店就有佢。」阿基讚小菌處理文字的能力很高：「佢真係會理解、感受你想講嗰樣嘢，而寫一啲經過佢思想轉化出嚟，有感情嘅文字。去到音樂方面，你聽嗰時有一個感覺，望到佢啲字又有令你感動嘅位。」