盧海鵬街市試咪　戚美珍同街坊玩急口令

戚美珍日前專程到街市拍攝奇妙電視節目《放試》，更乘機買了包括海鮮的平餸，返屋企煮番幾味，氹老公苗僑偉及仔女。她又應承下次請主持盧海鵬一齊食。

跨區撐場

盧海鵬到街市試咪，效法「街市DJ」揸住支咪，分別到水果檔推介蘋果、魚檔推介鯪魚肉及凍肉檔推介鹹豬手等，盧海鵬人生經歷豐富當然冇難度。所到之處，街坊與師奶亦步亦趨，更有「粉絲」跨區專程來到撐場，他每次推介幾分鐘後便賣晒推介餸菜的材料。

同街坊玩遊戲

盧海鵬又與戚美珍邀請街坊玩有獎遊戲，一位女小學生唸「廿蚊一斤雞，廿蚊一隻龜，你話雞貴定龜貴？」的急口令，另一位師奶參加創意打油詩，另外兩位主持簡采恩及鄺家銘立即接上，串連起來都幾呷韻，結果兩名參加者各獲鮮雞一隻，即晚可以開大餐！

此外，戚美珍又即場學「桃膠紅棗鮮奶糖水」，她表示回家後一於照跟着來煮，嘗美食之餘又可以補一下。