爆笑碩士季蘋蘋唔識「執番劑」

20170622
東網電視
更多新聞短片
廣東話啲潮語又真係幾難明。

大家有睇無綫節目《Ben Sir研究院》的話,都會覺得Ben Sir(歐陽偉豪)教廣東話夠晒生鬼,大家笑住得到知識,其實幾位研究生亦功不可沒,麥美恩、陸浩明、林頴彤及駱胤鳴當然搞笑,但今輯節目最搶鏡嘅絕對係講廣東話唔正嘅新同學季蘋蘋,蘋蘋成日Get唔到廣東潮語背後嘅另類意思,發音又唔正,搞出唔少笑話,佢又成日含情默默望住Ben Sir,左一句「Ben哥(哥字要用普通話讀)」、右一句「你搞到我淫(人)亂晒喇!」,令觀眾留下深刻印象!

背晒Twins啲歌

鏡頭前表現無知單純,但真實的蘋蘋是位碩士生,在杭州浙江長大,完成大學畢業後決定來港修讀傳理碩士課程,蘋蘋接受東網訪問表示自小已經對香港情有獨鍾,希望長大後來港發展:「我讀中學時同媽咪嚟香港旅行,行星光大道,見到香港夜景好靚,就想嚟香港嘅大學進修,依家算係dream comes true!(邊位香港藝人對你影響特別深?)初中開始唱Twins,佢哋當時喺杭州唔算特別紅,但我好鍾意佢哋啲歌,我唔識廣東話,但識唱晒Twins所有歌,佢兩個好得意,特別鍾意阿Sa(蔡卓妍)!」蘋蘋即場獻唱了幾句《女校男生》,音準不錯,廣東話咬字更比平日更準,果然係Fans。

導演變幕前

蘋蘋表示原本沒有打算做藝人,只是對電視台工作有興趣,豈料無心插柳「愈撈愈前」,由新聞部導演慢慢變成大家看到的綜藝節目主持:「我初初係自己send CV畀TVB嘅新聞部,因為同學科有關,想知香港電視台點運作,做過導演兩年幾,喺新聞部學到好多嘢,之後娛樂新聞主播要人,我讀書時有學過做主播,於是又試吓,到公司搵我拍攝《Ben Sir研究院》,我廣東話唔正,好丫,當學吓嘢亦都想把握每次機會。」

堅係唔識潮語

講到廣東話這話題,來港前蘋蘋並不懂得說廣東話,但已覺得廣東話非常有趣,有很多搞笑的字,語法亦比普通話更多變,來港後亦鬧出不少跟廣東話有關的笑話:「例如香港人想講『頭先』、『啱啱』會講『正話』,我開頭唔明,係咁問『正話』係邊個?係咪一個人名?」問到其廣東話程度是否真的如節目中那麼小學雞?蘋蘋笑說:「我都嚟咗香港幾年,有啲字係識嘅,但有啲潮語、歇後語真係拍咗個節目先識!最深刻好似係有集Ben Sir同吳業坤去揼骨,我真係以為『起雙飛』係同雙非兒童有關,另外仲有啲詞語好似『食塞米』、『跟機』、『紅都面晒』、『搬龍門』,同埋『執番劑』……中藥,呢啲都係拍節目後先知有特別意思。(有時有啲字眼會有鹹濕意味或者粗口諧音,有冇尷尬?)都冇嘅,都係反映真實,周圍都有人講緊呢啲字,唔使刻意避,平時我都有聽到,但唔明咩意思,依家終於明喇!」

髮型:O.H.Hair Salon
場地:阿利水韓國料理
鳴謝:Barry@J&B Ent