All in唔係讀「屙煙」！陳智燊教你講英文

最近劇集《賭城群英會》熱播中，戲中四哥謝賢風度翩翩嘅造型更加受到激讚，亦令到賭博用語成為最熱門話題，See See TVB Facebook專頁近日就上載咗一條有關賭博術語嘅英文版，負責教學嘅就係同四哥一樣咁有型有款嘅「燊神」陳智燊，不過佢似乎唔多願意教喎，點解嘅？

話說片段一開始，三位靚女王卓淇、楊嘉欣同關宛珊衝去燊神度，分別用廣東話、港式英文同國語問燊神：「寶寶輸了但寶寶不說」嘅英文點講？搞到燊神都冇咁好氣，仲話自己唔想教，三女即刻拎把刀出嚟恐嚇燊神，網民即留言話：「學英文啫，唔使用刀嘅。」

燊神惟有乖乖就範，仲話輸大錢之前可能會講：「All In」，有人會讀「屙煙」，燊神話錯晒，係讀「All in」！All In意思係晒冷，咁如果晒冷大你100萬又點講呢？就係「Raise you one million」，至於打牌扮有一手靚牌就叫「Bluff」。教到呢度，燊神都話要講番句：「I'm done.已經夠。」然後就好有型咁離開，佢仲留言話：「我係燊神，今日我畀3名女子持刀脅持。嗰一刻，我明白呢個世界雖然冇焗賭，但絕對有焗教。最後，片尾到底搞乜鬼？#睇電視學英文 #賭城群英會」

片尾到底搞乜鬼？咪就係燊神離場之後，片尾突然加插叻哥陳百祥嘅片段，叻哥仲話：「好叻呀？」網民都話叻哥呢個「亂入」又幾Match喎！

網民有話兒：

BBxxc：我想睇四哥教英文多啲！

陳x強：學英文啫，唔使用刀嘅。

Naxxx Chexxg：燊神幾時再教英文？

lee_Jxxx：叻哥呀！

Baxxhxxx：嗰三個女好嘈