同永山吵大鑊？滿島光OK手勢碎分手傳聞

31歲日本實力派女星滿島光去年初與導演石井裕也低調離婚，同年5月被爆火速搭上瑛太的28歲演員弟弟、電影《海邊的生與死》拍檔永山絢斗，兩人的關係不單獲事務所承認，亦獲得家人的肯定。然而貴為藝能界紅人的滿島光和永山，演出作品一部接一部，有時為了拍攝更要分隔二地，導致聚少離多，新一期《女性自身》雜誌就指，去年12月兩口子難得夾到時間約會，永山因前一晚太夜收工而瞓過龍遲大到，結果吵大鑊，今年4月的旅行計劃亦因工作告吹，有指他們關係未能修補，盛傳分手。

適逢下月底開畫的《海邊的生與死》昨日假東京舉行試會，滿島光和永山結伴出席，是爆出戀情後首度同台公開示人，當然成為傳媒焦點。雖然會上兩人未有提及戀情，但排排企分享拍攝點滴途中，兩度對望交談，席間亦面露笑容，氣氛唔錯。而他們落台準備離場時被記者追問分手傳聞，遂齊齊停下腳步，永山微笑點頭未有回應，滿島光則擺出冧爆笑容加OK手勢，力證感情冇問題。