高調必死！宋仲基宋慧喬拍拖低調有苦衷

宋仲基、宋慧喬自從合作神劇《太陽的後裔》之後，不時傳出拍拖消息，二人一直否認，今日卻突然宣布婚訊，並預計10月31日完婚，消息一出震驚娛樂圈！

拍拖係一件開心事，點解宋仲基同宋慧喬寧願不停「講大話」，都要否認事件？睇番佢哋嘅情史，公開高調拍拖都係分手收場，相信就係咁嘅原因，佢哋先至密冚呢段姊弟戀，去到傾掂晒先至一炮過公布婚訊。

現年35歲嘅宋慧喬，第一次公開的戀情是2003年合作《All In真愛賭注》的拍檔李炳憲，當年更形容這段戀情為「世紀之戀」，二人愛得高調，不時一齊拍廣告、接受訪問及同遊歐洲，不過戀情不足一年便玩完，有指二人因婚姻觀念不同而產生衝突。2004年與Rain因合拍韓劇《浪漫滿屋》後傳出緋聞，但經李炳憲一役後對戀情變低調，就算當年與Rain的緋聞傳得轟烈，但她最終亦沒有多作回應。2008年與玄彬合演韓劇《戀愛夢工場》後，有指因拍攝一場咀戲而擦出愛火，二人被拍得約會，至翌年8月二人才公開戀情，最終二人亦未能開花結果，至2011年玄彬入伍當日宣布與宋慧喬已分開。2014年與姜東元合作韓片《我的忐忑人生》傳出緋聞，更有網民直擊二人穿情侶裝到巴黎密會，更將照片上載到互聯網。最後經理人公司承認相片中是二人，但指兩人僅為拍攝雜誌寫真才同行。

現年31歲的宋仲基親口講過唔想公開戀情，佢嘅緋聞比較少一隻手都數得晒，2012年與文彩媛合作劇集《善良的男人》，在不知情下，鏡頭捕捉到他們摸頭互望甜笑等親密舉動而爆出緋聞，不過傳聞好快就消失。之後宋仲基喺一個訪問中被主持人旁敲側擊下，推測出與徐孝琳的戀情，消息一出當時引起好大回響，徐孝琳亦迅即被起底，更有指徐孝琳在宋仲基入伍時一腳踏幾船，宋仲基得知後，為忘記情傷一退伍即投入拍攝《太陽的後裔》，而最終與同劇女主角宋慧喬相識相戀及開花結果。