陳庭欣收飯局邀請　「價位」飆到二百萬

藝人陳庭欣（Toby）、何廣沛和華姐余思霆等在中環為無綫「big big channel」直播，今次與一班藝員直播玩桌上遊戲的Toby，就指平時自己都會直播「雀仔按摩」，吸引一班雀友與她交流。問平時直播會否收到古怪留言，她笑稱自己對眼識得自動過濾，但試過有人私訊求婚，非常有趣：「我未覆佢！（翟威廉嚟？）有名，但唔係姓翟！都試過用微博時試過收到下體相，好彩做藝人都身經百戰，識冷靜處理，叫佢唔好再Send，如果唔係就Blacklist佢。」她又指玩社交網站時收到飯局邀約：「最初就開廿萬，我試吓唔覆佢，睇吓佢會升到幾多，最後升到百幾二百萬！佢仲話我咩都唔使做，淨係食個飯，好彩我平時有睇《警訊》！」