結婚20周年　盧敏儀晒愛的宣言冧孫敬安

娛樂公司老闆孫敬安與太太盧敏儀慶祝結婚20周年，在紅磡設宴並邀請一眾圈中好友到場分享喜悅。盧敏儀自爆去年驗身時誤以為患上乳癌：「老公知道攬住我喊，後來再搵多兩個專家幫手驗，結果話係8至9成機會係『冇』乳癌，佢知道我冇事後又攬住我喊，令我知道佢好錫我。其實近幾年佢一直話搞Party慶祝結婚周年，但我冇應承，因為要搞好多嘢，要安排賓客等等，好辛苦，所以冇應承佢！但經過呢件事我應承咗佢而促成今晚宴會，今晚嘅賓客都係我哋心中有一定位置嘅人物，希望佢哋今晚可以開開心心，我唔想搞到咁形式，希望大家舒舒服服聚一聚，所以隆重亦得，牛仔褲亦得！」

送成個人畀太太

盧敏儀被問到有何說話對老公講？她冧晒「愛的宣言」說：「記得當初結婚嗰陣，我話會愛老公比老公愛我更多，但一直相處始終係佢愛我多啲，我份人比較任性，但老公都好錫我，好多時係佢為咗我改變自己、遷就我，我從來冇要求，而係佢自己主動去改變，所以可以話一切在心中！」孫敬安被問到有何禮物給太太？他笑言：「已經送咗成個人畀佢，太太就係我嘅一切，我嘅任何嘢都係屬於佢。今晚好多嘉賓由英、美、北京等地專程嚟到，要多謝佢哋，安排坐位都花咗好多時間，到尋晚都處理緊，因為有啲朋友聯絡我話嚟到，百忙中話抽到時間過嚟，多謝佢哋咁畀面。」