Cheronna@SG認同夏雨仔拍拖

20170711
東網電視
更多新聞短片
恭喜晒!

組合Super Girls(SG)成員Cheronna(吳嘉熙)跟樂隊Nowhere Boys、鄧小巧及黎曉陽在蘭桂坊酒吧表演。Cheronna之前被傳硬搶有未婚妻的「夏雨仔」黃奕晨(Dixon),兩個當事人已先後否認過,但雙方承認互有好感,而Cheronna出席活動時高呼拍拖了,大方承認與Dixon戀上了!

風騷認愛

Cheronna春風滿面並首度公開戀情說:「我拍拖喇。(拍咗幾耐?)啱啱開始咗冇幾耐,幾日囉,好新鮮熱辣,有出去打機同食飯。(佢追你定你追佢?)梗係佢追我啦,我係女仔嚟㗎嘛!(女仔都可以追男仔!)呢方面佢主動啲,我點都怕醜!」

被追問戀情點樣開始?Cheronna坦言與Dixon、朋友們有出來打羽毛球、行山、打機,大家係好正常食飯約會了解吓,說:「我好記得第一日識佢時,問佢係咪姓夏,係咪好白癡!」她承認之前大家表示過互有感覺,又冧滋滋說:「佢日前直問我可唔可以做佢女朋友,所以我哋先正式開始。」就這樣開始戀情。

大讚男友積極上進

Cheronna大讚男友好有正能量、好上進、工作好積極,她說:「我覺得佢好錫屋企人,好孝順,應該都會好錫我屋企人。」對之前Dixon被傳有「未婚妻」,Cheronna表示認識對方時,Dixon是單身,從未聽過對方有未婚妻,她說:「識佢時佢係單身,直至報道出咗話佢有未婚妻,佢都話唔知自己有未婚妻,唔知點解有呢啲傳言。(係咪佢之前有女友?)佢之前拍拖都係正常,但我冇問過佢,呢啲佢私事。」她坦言有同家人講拍拖事,但未有見家長,反而有次同Dixon食飯撞見過夏雨,但相信夏雨不認識自己。

唔會未婚生B

談到老友賴慰玲未婚有喜,她也戥對方開心,她說:「佢過咗3個月就話我知有喜,當時其他姊妹陳嘉寶、陳瀅都在場,我都感動到喊,但我唔係思貝(蔡思貝)咁喊咗10分鐘,我返屋企都有同媽咪講,因為媽咪都好錫佢,又煲燕窩、花膠湯畀佢,錫佢仲多過錫我。」問到可會像賴慰玲一樣未婚有喜?她說:「以我性格同處理方式應該唔會,應該結咗婚先,但依家都冇諗過結婚,可能我唔會結婚,因為我冇諗將來嘅嘢,將來唔知係點,目前工作最緊要。」