柏豪做星夢一哥 何哲圖望打造香港明星

20170711
東網電視
更多新聞短片
周柏豪加盟星夢做一哥。

星夢娛樂簽了周柏豪做「一哥」,星夢高層何哲圖(Herman)坦言好開心:「因為星夢一路都簽開歌手,而柏豪係一個可塑性好高嘅人,佢係歌影視三棲嘅明星,我哋嘅目標係透過杜生(杜之克)同余詠珊優質化嘅電視內容同平台,令柏豪更上一層樓,因為香港實在太耐冇出一個『明星』,我哋目標唔止喺香港,係要帶佢去其他地方,好似內地、東南亞,話畀大家知香港仍有明星存在。」

問到當日許廷鏗是否知道星夢簽柏豪所以不續約?Herman謂:「都冇人知我哋簽柏豪,直至尋日都係冇人知㗎,如果唔係外事部發通告,都唔會有人知啦,所以唔可以相提並論。」提到柏豪「空降」落星夢做一哥,其他歌手可會不開心?Herman謂:「唔會,咁柏豪資歷都有十年,所以比我哋旗下嘅年輕藝人資歷較深,柏豪有佢嘅輩份,有佢嘅熱誠。(點安撫鄭俊弘同胡鴻鈞?)個個都有唔同發展嘅,佢哋唱歌都只係五年時間,仲有好長嘅路去培訓,有佢哋嘅歌去唱,甚至胡鴻鈞都有劇同主題曲要唱。(咁鄭俊弘係咪再『雪吓添』?)不嬲大家都知我好錫佢,佢有新歌錄嘅,之前先錄完一首,我依家幫佢搵緊歌,會有新作嘅,個個人都有佢新嘅工作要做。」講到柏豪表示甚麼獎都想要,Herman笑言:「咁會一路畀好嘅角色佢,希望佢演出加油啦。」