組合「未能接通」出歌夠無聊：唔想太沉重

主音劉卓軒（Hinry）、鼓手Fing、結他手KK及bass手Rocky在兩年半前組成樂隊「未能接通」，這段時間經過堅持和努力，他們的首張EP將於7月15日推出，並會在當日舉行音樂會。現今香港充斥眾多不同風格的樂隊，而Hinry就笑言「未能接通」的特色就是無聊：「我哋啲歌詞係會用啲無聊嘢去包裝，唔想好沉重咁去講一個訊息。」例如他們新碟中的歌曲《Nothing To Celebrate》是以男朋友的角度出發，表達出每逢節日都不想與女友慶祝，覺得很浪費金錢及時間的感覺：「但其實背後講緊嘅係我哋香港或者大城市嘅節日，好多時都被商品化咗，我哋就係想諷刺呢個風氣。」

而他們的歌曲有另一個特色，就是以廣東話為主，再分別夾雜着英文或國語：「我哋幾個都係香港長大，粵語係我哋嘅母語，粵語歌曾經有過好輝煌嘅時代，依家其他亞洲地區建立咗佢哋嘅樂壇，令粵語歌好似式微咗啲，但我哋相信佢有佢嘅價值，所以好想引起其他地區嘅人注意，關注粵語文化！」會有這樣想法，是因為當初Hinry聽到韓文歌《My Destiny》中的一句歌詞「You are my destiny」，讓他想知道之後的韓文歌詞是甚麼意思，他說：「身為一個完全唔識韓文嘅人，因為英文呢個媒介去了解韓文文化，我就諗喇，如果粵語可唔可以都有個咁嘅媒介，去畀講英語或者華語嘅人去了解粵語文化，呢個係我哋呢隻碟入面想嘗試嘅小實驗。」