《金枝慾孽》成轉捩點　鄧萃雯推劇無數

藝人鄧萃雯到書展為好友張崇德的新書撐場，提到書中有她的經歷，她表示對方問到自己就答，又笑言：「可能佢跟蹤咗我好多年，98年係我人生最低潮，開始返藝人之家，崇德都喺度，我哋嗰時識，佢間中就Check吓我，問我點解要拍某套戲，話我唔覺得有問題咩？之後佢問我可唔可以幫手做呢本書，佢話因為睇到我有咩唔同。」

唔想再拍宮鬥片

接戲方面，她坦言由劇集《金枝慾孽》後開始多了很多考慮：「即使角色如妃娘娘咁成功，但之後我冇拍宮鬥片，我接到內地起碼一半劇本都係。（因為辛苦所以唔接？）辛苦就唔夠TVB，同埋錢多啲，唔好話我淨係為人仔（人民幣），其實我推咗好多。」她認為不少宮鬥片都是為鬥爭而鬥爭，別人覺得只要她演最奸的一角就會好看：「你叫我藐嘴藐舌咁害人，或者好有魅力咁害人，我都唔會做，因為會令人學壞。」

負資產爭名奪利

說到以前ICAC等節目，她表示從中學到正義的價值觀，知道不應該賄賂，想為社會做好事：「呢個係我考慮演唔演套戲嘅重要原因，但未有基督嘅信仰嗰時，我覺得最緊要搵食，仲要負緊資產，為爭名奪利同唔好被淘汰，都冇辦法，唔會諗咁多深層價值。《金枝慾孽》之後，就算我送唔到禮物畀觀眾，都唔好畀垃圾。」她指如妃很受小朋友歡迎，但這角色一出場就殺人，很擔心影響到小朋友：「我去學校做分享，佢哋話依家中學都已經好《金枝慾孽》，唔只Office，啲學生鬥到爭0.2分都唔會同人講讀咗書。」她覺得這世代很可怕，如果觀眾看電視時也要看鬥爭就不是太好。

推劇嗌肉赤

問到推了多少戲或劇？她笑言：「冇計，一計就『赤』。」她解釋當年接拍《師奶兵團》就是因為很正面，讚揚師奶的無私精神。提到早年為無綫拍攝電視電影，她形容是電視尺度上的性感極限，結果接到張崇德電話問她為何要拍：「我嗰時有好大堆專業演員嘅理由，佢後來見到我冇再拍，又嚟問我。（避佢電話？）冇，佢喺重要時刻先出現，好感激佢，2016年我畀傳媒話我批評《金枝慾孽》冇劇本，佢好撐我，呢啲真係朋友。」