書展：同林作唱反調　麥明詩教拒愛

前港姐冠軍麥明詩（Louisa）到灣仔書展出席頒獎活動，她透露是代媽咪麥何小娟領獎：「媽咪舊年出嘅書得獎，呢個係雙年獎嚟，所以有份拎。媽咪同Daddy去咗芬蘭玩，今日係嚟代佢領獎。（父母賣甩咗你？）係我請佢哋去玩嘅，近排叫做搵到錢。」

唔會出性感寫真

講到緋聞男友林作出書，問Louisa有否支持？她笑說：「睇過吓，初稿我都有畀意見。（覺唔覺啲橋同案例好熟悉？）熟悉，因為我有畀意見。（係咪用過啲招數追你？）唔清楚個對象，費事諗係邊個啦，大家都喺英國讀書。（佢話畀最愛嘅人？）我諗係畀佢婆婆。」問Louisa會否出書教識男仔？她就同林作唱反調出書教點拒絕追求者，笑言：「我好被動，可能教如何拒絕追求者，我份人比較婉轉，唔鍾意直接。（出寫真？）寫真都有好多類型，可以係好藝術性。（性感ok？）大家都睇到我喺《賭城群英會》都好錫身，身體都係個器皿嚟。」

講到在《賭》劇中被指演技尚有改進空間，她說：「眼神係弱點，成日都係待機狀態，自己都會改進，每日起身會練十次擘大隻眼。」