陳婉婷戀上「變性」陳庭欣　忍痛分手！

無綫劇《踩過界》掀起全城追劇熱潮，當中扮演跨性別人士嘅陳庭欣（Toby），未登場已成為熱話。而藝人陳婉婷（Hebe）喺劇中飾演「男兒身」Toby嘅女友，Hebe自言今次嘅角色對佢嚟講好大挑戰，所以拍攝前都有做足功課：「同Toby探訪完跨性別人士了解更多，之後拍攝內心戲都好順利。同埋性別認同障礙係與生俱來，但社會上仲有好多誤解，所以我哋都希望透過劇入面嘅角色，為跨性別人士發聲。」

見大家咁心急想知道劇情發展，Hebe都率先「劇透」話同Toby會係分手收場：「劇中我嘅角色係理解Toby想變性嘅決定，但始終我哋一齊咗咁耐，另一半有咁大嘅改變，一時三刻好難接受先離開對方。（怕唔怕劇集出街後畀觀眾鬧你？）我相信大家睇完會有唔同意見，預咗有觀眾鬧我，亦有人會明白我個角色嘅難處。」