祖藍找數扮聲超爆笑 李亞男最愛係乜?

20170721
東網電視
更多新聞短片
正呀喂!
百變藝人王祖藍一向扮嘢天分極高,幾年前佢喺《超級無敵獎門人終極篇》曾完美演繹過恐龍、超聲波同電鑽聲,一班粉絲都睇得好過癮,大讚佢扮得十分神似!近日,祖藍開設嘅製作公司其Facebook再度翻炒呢條片,網民睇完後反應都好踴躍,紛紛提議祖藍扮多啲各類型嘅聲。
王祖藍得悉後終於找數,應網民要求重溫番喺《獎門人》扮過嘅聲之餘,仲分別扮咗拉二胡、落雨開遮、打字、直升機等聲音。大家睇完題目係咪一頭霧水?呢個時候,祖藍唔使幾秒就Chok到聲出嚟,神似之餘仲要配合埋題目七情上面,真係睇到人笑爆嘴!好似佢扮直升機時,就皺住眉、瞪大隻眼兼伸出條脷狂震,唔講仲以為佢鬼上身添!另外扮落雨開遮時亦五官扭曲咁做埋開遮手勢,個樣勁滑稽,就連幕後工作人員都忍唔住笑到倒瀉水。不過講到最勁爆嘅,一定唔少得片末祖藍私人大放送嘅絕技「人形海馬」,祖藍仲大爆老婆李亞男最愛佢咁扮,唔知大家睇完又收唔收貨呢?