女兒病倒入院　薛家燕緊張：佢唔畀我知！

藝員薛家燕、湯洛雯、姚子羚、黎諾懿、林嘉華、劉溫馨、張頴康等到尖沙咀出席新劇《燦爛的外母》慰勞宴，活動上宣布新劇將於8月28日播出。薛家燕除了與黎諾懿夾錢請食飯外，更帶同一批代言的家電當作抽獎禮物，實行與眾同樂：「真係好開心啲同事嚟齊晒，套劇又咁快播，真係好少有。（知道原因？）應該係大家睇好我哋套劇，係好啱一家人睇，我都兩年冇拍劇，套劇好開心搞笑，除咗有外母同女婿嘅溝通問題，仲有好多元素，搞到我都有少少壓力，嚟緊我都要錄歌，唱主題曲！」

拍劇期間病倒

薛家燕直言七月特別忙碌，加上遇着流感高峰期，拍劇期間不幸病倒：「中咗流感呀，咳到心都痛埋，瞓唔到覺，去咗搵醫生打針，夾埋打咗兩支，流感針同開聲針，醫生都話唔打得多，返到劇組大家見我唔講嘢就知我病，監製嚟到見到就叫我休息，都停咗兩組戲、抖咗三日，我都唔知流感咁危險，以為自己頂得順，當時仲度緊期上郵輪演出。（聲沙都唱歌？）沙聲佢哋都畀掌聲我㗎！結果都瘦咗5、6磅。」

薛家燕患上流感，女兒石祐珊亦不慎病倒，女兒更瞞住薛家燕入院，令薛家燕大為緊張：「個女都入咗院，仲要唔畀我知！我返到屋企唔見珊珊，個傭人反問我『你唔知珊珊入咗院？』我先知！佢係過勞，除咗幫我接廣告，仲幫我跟緊啲課程，7月兩母女都好忙。」