6位數開美人魚學院 蕊蕊晒E奶畀裸男抱抱
藝人蕊蕊以老闆娘身份到將軍澳出席「香港美人魚明星學院」池畔派對,並進行慈善義賣,她更與鄧詠雪及湯沛宜(ToTo)化身美人魚落水表演,展示優美泳姿,她們上身穿Bra Top,下身戴上美人魚鰭,蕊蕊及ToTo分別晒出強勁E Cup及D Cup「胸」器,揮低只有A Cup的鄧詠雪。三女由三名半裸大隻外籍猛男抱住出場,夠晒氣勢!現場請來大批嘉賓撐場,包括陶枳樽、黃建東、瑪姬、馮凱淇、周嘉莉及葉芷如等,場面熱鬧。
蕊蕊表示美人魚泳式在外國已非常流行,希望在香港宣揚這種運動,今次她投資了六位數,有信心幾個月內回本:「係有啲風險,但本身香港已有呢類課程,我再投資搞大佢,而且唔需要特別有個地舖交租金,慳番少少,只需要投資宣傳同買安全器材,我覺得呢個運動好有樂趣,可以減壓,呢幾個月我學咗游水,自信心都大咗。(有冇幫到瘦身?)有呀,我本身條腰較短,畀人粗嘅感覺,要搵嘢遮,練咗美人魚泳式係幫到瘦腰。」
單身逾一年的蕊蕊表示近期籌辦新公司忙到爆,沒有時間搵另一半,但因自小已很喜歡美人魚,現有夢想成真感覺十分充實,問會否順便結識男學員?她笑說:「現場嗰啲猛男都識咗好耐,唔使啦!不過我都希望搵到個Merman(男性美人魚)。」