東方日報C1：孫耀威陳美詩蝦碌行禮

歌手孫耀威（Eric）與女友陳美詩昨日在港舉行結婚儀式，兩人交換戒指及讀誓詞後發生蝦碌事，還未等牧師正式宣布結為夫妻，已興奮得衝落台與親友慶祝！一對新人全程咀足8 次，Eric更Sweet爆表示彼此已兩位一體，兩人的英文名字頭「M」加上「E」，變成不能拆開的「ME」，寓意白頭到老！

現年44歲的孫耀威與36歲的陳美詩早前已在美國洛杉磯註冊結婚，他們昨日在堅尼地道即將重建的三級歷史建築物的佑寧堂，於牧師及親友見證下行禮，成為最後一對在該處行禮的新人，婚禮於下午4時正式開始。Eric獻唱聖詩《Deeper In Love》，以歌聲伴着Macy步入教堂，憑歌寄意向老婆示愛，場面溫馨甜蜜。穿白色低胸婚紗的Macy由父親翹住步入教堂，本身上圍有C Cup的她谷到行變E奶，配以一身500萬閃爆鑽飾，成為至吸睛新娘！

宣讀誓詞勁緊張

在過百親友見證下，Eric先為太太戴上結婚戒指，全程笑容滿面地宣讀誓詞。他表現得相當緊張，在場親友即拍掌為他打氣，他感激Macy一直以來的支持及愛護，並大讚她是個好妻子：「今日喺大家見證下，我已經唔係一個人嘅『我』，Macy加Eric，M加E，係一個新嘅『ME』，新嘅『我』，『我』以後就等於我加埋你，所以我哋以後唔可以再拆開，因為拆開就唔係完整嘅我！」而Macy亦情深回應：「雖然性格不盡相同，但往往又可互補不足，我並唔完美，但感恩有一個近乎完美嘅你。」兩人朗讀誓詞及共點蠟燭後，興奮得十指緊扣衝落台，豈料遭牧師出手拉番上台，原來儀式尚未完成！牧師要求他們平排站立，進行「咀嘴」環節後，隨即宣布兩人正式結為夫婦才禮成。

Eric其後致詞時，坦言知道由踏入娛樂圈一刻，家人就擔心到現在：「我喺出面唔識做人，闖禍啦，得罪人多稱呼人少，不過今日我就喺大家面前行人生嘅另一步，希望屋企人唔使擔心，因為多個人照顧我，多個人鬧我，所以唔使擔心！」在旁的Macy坦言眼淚沒有滴下來，但心裏充滿愛，兩人落台和親友大合照時，Eric再次忍不住親吻Macy臉頰。

哮喘病發照獻唱

受訪時，兩人應傳媒要求啜足5次，Macy更體貼地幫老公抹嘴。Eric透露哮喘病發，幸好唱歌時未有受影響。提到Macy佩戴500萬鑽飾行禮，Eric表示是他的心意：「我哋嘅戒指刻住對方個名，沖涼去廁所都唔會除，好好提醒自己有老婆。（想生幾多個小朋友？）我唔介意佢生幾多個，佢都幾好生養！」又搞笑說：「訂咗酒店超級大套房，兩個人鴛鴦戲水，張床大過韋小寶嗰張，幻想有7個佢（Macy）！」並透露今次婚禮場地較細，之後會再物色較大的場地再次行禮。

更多新聞，請瀏覽東方日報網頁：

http://orientaldaily.on.cc/