提男友好避忌　林一峰話唔好講呢啲

歌手林一峰為九月的演唱會舉行記者會，今次個唱以已故歌手陳百強（Danny）的歌為主題，因陳百強是一峰母親的偶像，在記者會上一峰亦即場演繹Danny的歌曲。問到一峰可會問母親到時個唱可想他唱那首Danny歌曲？一峰謂：「 唔得，唔會問，我會自己諗，要畀啲驚喜阿媽，到時佢就知。（你估佢想聽Danny嘅大熱歌還是滄海遺珠？） 咁我要做下資料搜集先，總之唔會畀佢知道Rundown，不過點都會唱大路歌，尤其知道阿媽好鍾意首《深愛著你》。」

到時妹妹林二汶可會做嘉賓？一峰說：「應該唔會，因為我搵咗個識咗十幾年又曾經合唱過嘅人嚟做嘉賓，而且大家見到佢都開心嘅。」

問到男友可來捧場？一峰即煞有介事說：「唔好講呢啲啦！總之我感情生活十分健康愉快，所以我可以將百分之120嘅時間放落音樂到，將我嘅兒女私情就放喺騷到。（但依家好多藝人同名人都多咗走出嚟公開佢哋「取向」？）咁咪好囉，我覺得呢個世界做人最緊要光明磊落，同埋喺行業裏面有建樹！（未係Timing？）愛情留番畀自己珍藏，音樂就可以同大家分享 。」